Romantic Poetry In Urdu By Nadia Sahar

تری خوشبوٶں سے سجا سماں ، ترے ساتھ  بھی ترے بعد بھی

ترا  ذکر   ہے   مرے  مہرباں ، ترے   ساتھ  بھی  ترے  بعد  بھی

مجھے  تجھ  سے نسبتِ  خاص  ہو  ، ترا  نام  آۓ جہاں  جہاں

مرا   نام   آۓ   وہاں  وہاں  ، ترے   ساتھ  بھی  ترے  بعد  بھی

تو نے ہاتھ  ہاتھوں  میں  کیا  لیا ،  مری   زندگی  ہی  بدل  گٸ

مجھے پھول جیسی لگی خزاں ، ترے ساتھ بھی ترے بعد بھی

کوئی  واہمہ  سا  خیال  میں  ،  جو  رہا  ہے  دھیان  گیان  میں 

نہ  یقین تھا  نہ کوئی  گماں  ، ترے ساتھ  بھی  ترے بعد بھی

کبھی دل کی ڈور  سے  باندھ  لیں یہ جو سلسلہ ہے خلوص کا

رہے دوستی  یونہی  درمیاں ، ترے ساتھ  بھی ترے  بعد  بھی

اے  مرے  مزاج  کے  ہم نوا ،  مجھے پھر  سے آن  کے مل وہیں 

تری  شام  سے ہے  سحر جہاں ، ترے ساتھ  بھی ترے بعد بھی

نادیہ سحر

۔۔۔۔۔۔۔۔۔۔۔۔۔۔۔۔۔

  Romantic Poetry In Urdu By Nadia Sahar

عمروں سے لمبی محصوری ، کیا کھویا ؟ کیا پایا ؟

پنجرے میں ملتی ہے چُوری، کیا کھویا ؟ کیا پایا؟ 

  کیا کھویا ؟ کیا پایا ؟ بولو حد درجہ قربت میں 

سات سمندروں جیسی دوری ، کیا کھویا ؟ کیا پایا؟

 دل بھی ہوا ہے ٹکڑے ٹکڑے ، دھڑکن کرچی کرچی

دن بھی آدھا رات ادھوری ، کیا کھویا ؟ کیا پایا؟

  کیسے جی پاٸیں گے آخر کتنا کرب سہیں گے ؟

جیون سے لمبی مہجوری  ، کیا کھویا ؟ کیا پایا؟

کل تک تھی جو بات ضروری اس کی سب باتوں سے 

آج وہی تھی غیر ضروری ، کیا کھویا ؟ کیا پایا؟

 ایک بھی سپنا کِھل نہیں پایا جیون کی ٹہنی پر 

ایک بھی خواہش ہوٸ نہ پوری ، کیا کھویا ؟ کیا پایا؟

 خالی  دامن  خالی  آنکھیں  خالی  دل  اور  ہاتھ 

کر کے  جیون  بھر  مزدوری،  کیا  کھویا  کیا  پایا؟

 اس کے لوٹ  آنے سے بھی کب حال  ہوا  ہے اچھا  

بھر آٸی ہیں آنکھیں بھوری ، کیا کھویا ؟ کیا پایا؟

 دنیا کی باتوں میں ہم نے عمر گنوا دی اپنی

دل کی باتیں رہیں ادھوری، کیا کھویا ؟ کیا پایا؟

سحر بُھلا دو  بے معنی ہیں اب ماضی کی باتیں 

کس کی کیسی تھی مجبوری ، کیا کھویا ؟ کیا پایا؟

نادیہ سحر

۔۔۔۔۔۔۔۔۔۔۔۔۔۔

Romantic Poetry In Urdu By Nadia Sahar

راستے خوف سے بھرے ہوۓ ہیں 

لوگ اندر سے سب ڈرے ہوۓ ہیں 

 وقت  بدلا  کہ  آٸینہ  بدلا 

وہ جو پہلے تھے دوسرے ہوۓ ہیں

 زخم ہی زخم ہوگۓ ہیں ہم

درد ہی درد سے بھرے ہوۓ ہیں

 کچھ تو ایسا ہوا ہے جس کے سبب

اپنے ساۓ سے بھی ڈرے ہوۓ ہیں

کل جہاں زندگی دھڑکتی تھی 

آج وہ محل مقبرے ہوۓ ہیں 

سامنا کیا ہوا کسی سے سحر

مندمل زخم بھی ہرے ہوۓ ہیں

نادیہ سحر

۔۔۔۔۔۔۔۔۔۔۔۔۔۔ 

Romantic Poetry In Urdu By Nadia Sahar

چاند  کے  دل میں چاندنی میں دراڑ

آ  گٸ   کیسے   روشنی    میں   دراڑ

دن   مقدر  میں  یہ  بھی  لکھے تھے

پڑ   گٸ   اپنی   دوستی  میں   دراڑ

کس  کی   آہٹ  ہے  کوچہُ  دل  میں 

کس  نے  ڈالی  ہے خامشی میں دراڑ

جس طرح  ہم  ہوۓ ہیں میں اور تو

اس طرح کیوں پڑے کسی میں دراڑ

جاں   بدن   سے  نکلتی   جاتی   ہے 

بڑھتی  جاتی  ہے  زندگی  میں  دراڑ

پھر     زیادہ    جیا      نہیں     کرتا 

ڈال  دے  غم   اگر  کسی  میں  دراڑ

آخرش   گھیر   ہی   لیا    غم     نے 

پڑ گٸ  پھر سحر خوشی میں دراڑ

نادیہ سحر

۔۔۔۔۔۔۔۔۔۔۔۔۔

Romantic Poetry In Urdu By Nadia Sahar

رتیں  بدل  گٸیں  مگر  بحال  ہیں  اداسیاں 

رکی ہوٸی ہیں مجھ میں لازوال ہیں اداسیاں 

گھلی ہوٸیں ، بسی ہوٸیں ، رچی ہیں برگ و بار میں 

تمھارے میرے بیچ ڈال ڈال ہیں اداسیاں

کبھی یہ پوچھتی ہیں کچھ کبھی یہ سوچتی ہیں کچھ 

کہیں جواب ہیں کہیں سوال ہیں اداسیاں 

لپٹ رہی ہیں مجھ سے جیسے ہوں مری سہلیاں 

گمان ہو رہا ہے جیسے شال ہیں اداسیاں 

یہی ہیں میری ہمسفر، یہی ہیں میری چارہ گر

قدم قدم پہ میری ہم خیال ہیں اداسیاں

الجھ گۓ ہیں دام میں نکل نہ پاٸیں گے کبھی 

کبھی کبھی تو لگتا ہے کہ جال ہیں اداسیاں 

یہ کن اداسیوں کی قید میں یہ اداسیاں 

یہ کن غموں کے بوجھ سے نڈھال ہیں اداسیاں 

اسی لیے میں خود بھی ان سے دور بھاگتی نہیں

کہ زندگی کا حسن ہیں جمال ہیں اداسیاں 

بنا کے مورچے کھڑی ہوٸی ہیں میری راہ میں 

مرے خلاف زندگی کی چال ہیں اداسیاں

کبھی کہوں کہ ماہ و سال ان میں قید ہیں سحر

کبھی کہوں اسیرِ ماہ و سال ہیں اداسیاں

نادیہ سحر

۔۔۔۔۔۔۔۔۔۔۔۔۔۔۔

Romantic Poetry In Urdu By Nadia Sahar

آپ   کے   پاس   جو   دلیلیں   تھیں 

ان سےآگے بھی کچھ  فصیلیں تھیں 

 سوکھ  کر  دشت  ہو گٸیں  آنکھیں 

یاد ہے کچھ کبھی یہ جھیلیں تھیں

پاٶں  زخموں   سے  بھر  گۓ  میرے 

راہ  میں کانچ  تھے  نہ  کیلیں تھیں

 فاصلے   بیچ   کے   مٹا   نہ  سکیں

بے  اثر    منطقیں    دلیلیں    تھیں 

صرف  مظلوم  ہی گرفت  میں تھے

ظالموں  کے  لیے  تو  ڈھیلیں  تھیں 

 قید   میں   دل   سحر   تڑپتا   رہا

ہر  طرف   درد  کی  فصیلیں  تھیں

نادیہ سحر

Romantic Poetry In Urdu By Nadia Sahar

ترا    عکس   تیری    جھلک   کھوگٸ  ہے

کہ  پھولوں  سے  گویا  مہک   کھوگٸ ہے 

سفر   میں   گزر    جاۓ    گی   زندگانی 

تری   سمت   جاتی   سڑک   کھوگٸ   ہے

 

بہت دور تک دل میں کچھ بھی نہیں ہے 

تمنا    کہیں    دور    تک    کھو گٸ    ہے

ستاروں سی  آنکھوں  میں ویرانیاں ہیں 

کہاں  ان  کی  ساری  چمک  کھوگٸ  ہے

ہے   سازش   رچاٸی   ہوٸی  بارشوں  نے 

کہیں   آسماں  میں  دھنک   کھو گٸ  ہے

ترے  ہجر  نے  مجھ کو  بےحس  کیا  ہے

مرے  زخم   میری   کسک   کھوگٸ   ہے

نجانے   مجھے  ایسا  کیوں  لگ  رہا  ہے

مری    زندگی    دور   تک   کھو گٸ  ہے

جہاں  اس نے چھوڑا  سحر  ہاتھ  میرا

وہیں  چوڑیوں  کی  کھنک  کھوگٸ  ہے

نادیہ سحر

Romantic Poetry In Urdu By Nadia Sahar

موسم    ایسا   بدل   گیا    آخر

پھول  سا   دل  مسل  گیا   آخر

خواب  تھا  اور  موم  جیسا تھا

رفتہ   رفتہ    پگھل   گیا    آخر

پھر   مقدر   نے   ہار   دی   بازی 

پھر    نٸ   چال   چل   گیا  آخر

بجھ  گٸ  رات  آنکھ  مَلتے ہی 

شوق  کا  چاند   ڈھل  گیا  آخر

چند  لمحے کِھلا  دھنک  بن  کر 

خواب آنکھوں میں جل گیا آخر

جلتا     بلتا     الاٶ    غربت   کا 

ساری   بستی   نگل    گیا   آخر

پھیر  لی  ہم نے بھی نگاہ سحر

وہ   بھی   رستہ  بدل  گیا  آخر

نادیہ سحر